Конкурс «Лепшыя тавары Рэспублікі Беларусь»

1. Галоўная
2. Раздзелы
3. Дзейнасць
4. Якасць і дзелавая дасканаласць
5. Конкурс «Лепшыя тавары Рэспублікі Беларусь»

апублікавана 28.01.2025 22:44

Конкурс «Лепшыя тавары Рэспублікі Беларусь» праводзіцца штогод, пачынаючы з 2002 года, па сумеснай ініцыятыве Дзяржстандарта, абласных выканаўчых камітэтаў і Мінгарвыканкама.

З 2023 года конкурс праводзіцца ў адпаведнасці з пастановай Дзяржстандарта ад 20 снежня 2022 года № 121, якім зацверджана Інструкцыя аб парадку правядзення конкурсу «Лепшыя тавары Рэспублікі Беларусь».

Мэтамі правядзення конкурсу з'яўляюцца:

• інфармаванне спажыўцоў аб якасных таварах у інтарэсах іх вытворцаў і садзейнічанне прасоўванню прадукцыі на ўнутраны і міжнародны рынкі;
• падтрымка беларускіх вытворцаў, якія выпускаюць канкурэнтаздольныя тавары;
• садзейнічанне забеспячэнню спажывецкага рынку Рэспублікі Беларусь высакаякаснымі і канкурэнтаздольнымі айчыннымі таварамі;
• стварэнне перадумоў, садзейнічанне шырокаму ўкараненню сучасных метадаў кіравання і забеспячэння якасці на аснове айчынных і міжнародных стандартаў і перадавых дасягненняў у галіне якасці;
• выяўленне новых або ў значнай ступені ўдасканаленых тавараў у параўнанні з таварамі, якія выпускаліся раней.

Удзельнікамі конкурсу могуць быць юрыдычныя асобы, фізічныя асобы, якія вырабляюць прадукцыю і аказваюць паслугі на тэрыторыі Рэспублікі Беларусь.

Конкурс праводзіцца па наступных намінацыях:

• харчовыя тавары;
• прамысловыя тавары для насельніцтва і вырабы народных промыслаў;
• прадукцыя вытворча-тэхнічнага прызначэння;
• паслугі насельніцтву.

У кожнай намінацыі па рашэнні рэспубліканскай конкурснай камісіі сярод лаўрэатаў конкурсу могуць быць вызначаны тавары для прысуджэння статусу «Навінка года», а таксама спецыяльных узнагарод «Стабільная якасць», «Лепшы ў галіне», «Выбар спажыўца», «За поспехі ў імпартазамяшчэнні».

Прэтэндаваць на прысуджэнне статусу «Навінка года» можа тавар-лаўрэат, тэрмін выпуску якога не перавышае два гады, для якога меркаваная галіна прымянення (выкарыстання), функцыянальныя характарыстыкі, прыкметы, канструктыўнае выкананне, а таксама склад ужывальных сыравіны, матэрыялаў і кампанентаў з'яўляюцца новымі або ў значнай ступені адрозніваюцца ад тавараў, якія выпускаліся раней у Рэспубліцы Беларусь, а таксама, як правіла, выпускаюцца па прынцыпова новых тэхналогіях або пры спалучэнні новых і існуючых тэхналогій.

Прэтэндаваць на атрыманне спецыяльнай узнагароды «Стабільная якасць» могуць тавары-лаўрэаты не больш двух разоў пры ўмове:

• пацвярджэння звання лаўрэата конкурсу 5 і больш разоў запар;
• пацвярджэння імі належнай якасці тавараў на працягу года, які папярэднічае году правядзення конкурсу;
• наяўнасці не менш трох сертыфікаваных сістэм кіравання (менеджменту);
• наяўнасці дыпломаў лаўрэатаў конкурсаў у галіне якасці за апошнія 5 гадоў (Прэмія Садружнасці Незалежных Дзяржаў за дасягненні ў галіне якасці прадукцыі і паслуг, Прэмія Урада Рэспублікі Беларусь за дасягненні ў галіне якасці і інш.).

Прэтэндаваць на прысуджэнне спецыяльнай узнагароды «Лепшы ў галіне» могуць тавары-лаўрэаты, якія набралі найбольшую колькасць балаў у асобным галіновым напрамку. Для параўнальнай ацэнкі тавары гэтых канкурсантаў вылучаюцца ў асобныгаліновы напрамак у выпадку ўдзелу ў адной намінацыі не менш за 5 канкурсантаў, якія вырабляюць тавары аднайменнай групы.

Прэтэндаваць на прысуджэнне спецыяльнай узнагароды «Выбар спажыўца» могуць тавары-лаўрэаты, якія набралі найбольшую колькасць галасоў спажыўцоў на онлайн-галасаванні. Сакратарыят рэспубліканскай конкурснай камісіі не пазней чым за два тыдні да пасяджэння рэспубліканскай конкурснай камісіі размяшчае ў глабальнай камп'ютарнай сетцы Інтэрнэт на партале «ЯКАСЦЬ.БЕЛ» пералік фіналістаў і інфармуе спажыўцоў аб магчымасці пакінуць свае водгукі ў дачыненні да канкурсантаў і якасці тавараў, заяўленых на конкурс.

Прэтэндаваць на прысуджэнне спецыяльнай узнагароды «За поспехі ў імпартазамяшчэнні» могуць тавары-лаўрэаты, якія ўключаны ў праграмы імпартазамяшчэння і (або) пералікі прадукцыі, якая адносіцца да імпартазамяшчальнай, што пацвярджаецца дакументальна, пры наяўнасці не менш за 5 водгукаў спажыўцоў.

Да ўдзелу ў конкурсе не дапускаюцца тавары, якія адносяцца да наступных катэгорый:

• лекавыя сродкі;
• тытунёвыя вырабы;
• узбраенне і ваенная тэхніка;
• харчовыя тавары, якія маюць у складзе генетычна мадыфікаваныя арганізмы, змяшчэнне якіх перавышае значэнні, устаноўленыя ў адпаведных тэхнічных нарматыўных прававых актах у галіне тэхнічнага нарміравання і стандартызацыі;
• тавары, да якіх прад'яўлены прэтэнзіі да якасці з боку прадстаўнікоў органаў дзяржаўнага кантролю і нагляду і спажыўцоў на працягу года, які папярэднічае конкурсу;
• паслугі, якія адносяцца да дзейнасці ў сферы ігральнага бізнесу.

Конкурс аб'яўляецца сакратарыятам штогод у сакавіку на сайтах Дзяржстандарта і БелДІСС, а таксама праз сродкі масавай інфармацыі. Адначасова публікуюцца адрасы абласных конкурсных камісій для падачы заявак на ўдзел у конкурсе.

Конкурс праводзіцца ў два этапы.

На першым этапе абласнымі конкурснымі камісіямі вызначаюцца тавары-фіналісты і сярод іх тавары, якія прэтэндуюць на прысуджэнне статусу «Навінка года».

На другім этапе на аснове матэрыялаў, прадстаўленых абласнымі конкурснымі камісіямі, рэспубліканскай конкурснай камісіяй падводзяцца канчатковыя вынікі конкурсу: прысуджэнне таварам звання лаўрэата конкурсу і статусу «Навінка года», вызначэнне тавараў-лаўрэатаў для ўзнагароджання спецыяльнымі ўзнагародамі «Стабільная якасць», «Лепшы ў галіне», «Выбар спажыўца», «За поспехі ў імпартазамяшчэнні».

Арганізацыі, якія жадаюць удзельнічаць у конкурсе, падаюць да 1 верасня заяўку з неабходнымі дакументамі ў сакратарыяты абласных конкурсных камісій, сфарміраваныя ў абласных цэнтрах стандартызацыі, метралогіі і сертыфікацыі і РУП «Беларускі дзяржаўны інстытут метралогіі» (для Мінска і Мінскай вобласці).

Канкурсанты, тавары якіх удастоены звання лаўрэата конкурсу, узнагароджваюцца дыпломам і спецыяльнымі ўзнагародамі.

Інфармацыя аб таварах-лаўрэатах размяшчаецца на сайце Дзяржстандарта, на партале «ЯКАСЦЬ.БЕЛ» і ў штогадовым ілюстраваным каталогу «Лепшыя тавары Рэспублікі Беларусь».

Аплата расходаў на правядзенне конкурсу ажыццяўляецца за кошт сродкаў, якія ўтвараюцца з арганізацыйных узносаў. Памер узносаў, а таксама парадак іх аплаты вызначаны ў інструкцыі аб парадку правядзення конкурсу «Лепшыя тавары Рэспублікі Беларусь».

Дадатковую інфармацыю аб конкурсе можна атрымаць у БелДІСС па тэлефоне +375 17 269 69 64, е-mail: ntc@belgiss.by або ў сакратарыятах камісій, указаных у табліцы.

Інструкцыю аб парадку правядзення конкурсу "Лепшыя тавары Рэспублікі Беларусь» і заахвочвання пераможцаў можна заказаць у БелДІСС па тэл.: +375 17 269 69 12, е-mail: shop@belgiss.by.